Tilgangur Ödu er að skapa vettvang til að styrkja konur og kynsegin fólk sem leggur stund á nám á tæknitengdum sviðum. Ada vill skapa öruggt umhverfi fyrir konur og kynsegin fólk til að mynda tengsl, deila reynslu sinni og styðja hvert annað. Jafnframt vill Ada upplýsa verðandi nemendur um tækifæri á tæknitengdum sviðum og auka sýnileika kvenna og kynsegin fólks sem fyrirmynda í tækniheiminum.

Árið 2017 voru aðeins 28% nýnema í tæknigreinum konur og hlutfallið var einungis 25% árið 2018. Ada stefnir að því að bregðast við þeim vanda að konur hætti í tæknitengdu námi innan Háskóla Íslands og fjölga umsækjendum ár hvert.

Utan háskólans vinnur Ada með fyrirtækjum og öðrum háskólastofnunum að því að auka sýnileika kvenna og kvára í tækni og efla jafnrétti allra kynja innan fagsins.